6 bajne me kuch der aur ufaq me halki si roshni baaqi thi, isi roshni ki khatam hone se pehle Shoib Ahmed apne bhai Najeeb k ghar puhacha tha. Ghar k bahar lagi takhti pe roshan Alfaz pe Najeeb ka naam darj tha hala k najeeb ka ye ghar Kisi waqt shoib ka b ghar hua karta tha aur najeeb k naam ki ye plate shoib ne khud hi lagwayi thi... par ab wo apne hi ghar me ek mehmaan ki hesiyat me tha. Ghar me dakhil hote waqt aur muqrara kamre tak puhchte waqt shoib k zehn me wo saare manzar jin ko us ne dil ke nichle tehkhaane me band kardia tha, roshni ki raftar se unhone dil se zehn tak ka safar tay kia tha...
Najeeb ka chehra kisi b jazbat se khali tha pr us ki bivi Zartasha ne qadre rukhey andaz me use khushaamadeed kaha tha aur haath milate waqt shoib ne najeeb ki haatho ki kapkapahat ko mehsoos kia tha... use esa laga tha k ye kapkaphat shayad us ki dil ki jazbat ki waja se he jo chehre se na sahi haatho k lums se mehsoos ho rahi he ..
Un se milne se lekar sofe tak bethne ka safar tay karte waqt use pata chala tha k har faasla pairo ka nahi hota... dil k b faasle hote hen jo b buhat dilshikasta hotey hen...
Najeeb ne baat shuru karte waqt lambi tehmeed bhaandhi thi par shoib ka dhyaan Najeeb ki baato pe nahi balke us k saamne lagte huye sunehri wallclock pe tha jis k uper likhe sunehri lafz "Home and Family" Shoib ko buhat ranjida kar rahe they aur tab us ne mehsoos kia tha Lafz Home k O wala daayera bara ho raha he wo manzar badal raha he...
Ab manzar badal chuka tha aur O wala daayera use pichle waqt me le gaya tha jab yahi kamra tha yahi log they aur un sab ki tezz bolne ki awaz.... Najeeb aur us ki bivi Zartasha use saanp keh rahey aur baqol un k ye wo aastin ka saanp tha jis ne un ka doodh pee k unhe hi dasaa tha... ye lafz Shoib k dil me kisi teer ki tarha chubh rahe they par wo khaamosh tha... Alfaaz dunya banatey hen aur alfaaz hi dunya bakhairte hen... in sab me ek aur b shaks tha, Najeeb ka Maamu jo Shoib pe Ayashi aur karbor k paise ke naajayez istemaal ka ilzaam bhi laga raha tha... Shoib ne saari ghuthi seconds me suljahyi thi pr us ne koi safayi di thi na kuch kia tha sirf itna kaha tha k ye ilzam ap saabit karden... is baat ka un k paas koi jawab nahi tha... shoib ko pata tha k us ka qasoor kia he... us ka qasoor sirf aur sirf itna tha k wo sotella tha.... Shoib ki umar sirf 12 saal thi jab najeeb k baba ne use apne ghar me jaga di thi Najeeb us waqt sirf do saal ka tha... us waqt se leke aaj tak us ne hamesha Najeeb ko bhai mana tha aur Baba k guzarne k baad bhi karobar sambhalte waqt wo ye baat dil me kar chuka tha k wo sab kuch najeeb ko dega us k baaligh hone k baad... Qasoor to Najeeb ka b nahi tha kiyun k us k kaano me zehr ghol dia gaya tha... Alfaaz ka Zehr...jis ki dawa aur marham waqt k siwa kisi k paas na tha... wafadari shoib k khoon me thi par shoib un ka khoon nahi tha aur shoib ne socha tha shayad yahi us ka qasoor tha... najeeb sirf 24 saal ka tha jab us ne apne bhai pe namak harami ka ilazaam laga k use ghar se jaane ko kaha tha... shoib ne kisi baat se inkaar nahi kia tha... koi behs nahi ki thi bs chup chaap sab kuch un k hawale kar k nikal gaya tha kiyun k use ye karna hi tha... use dolat nahi chahye thi use bas family aziz thi, apna ghar aziz tha aur wo ghar hi na raha tha to shoib ne ye behtar samjha tha k wo b is ghar me na rahey...
Us din k baad aj pehli baar tha k wo us ghar me betha tha aur ghar ko dekhte huye use sab yaad aa raha tha... yaden us ki aakhon k kinare se chote moti baha rahi thi aur wo khamosh nam aankho se un ki baate sun raha tha...
Use wo din b yaad tha jab usi k haatho me khel k bara hone wala najeeb us se tezz awaz me baaten kar raha tha par aj najeeb ki aawaz dheemi thi...
Shoib ko yaado me gum paa kar najeeb ne khankara tha...
"To kaha rehte hen ap ab, najeeb ne kaha , kia kaam karte hen?"
"Me ek company me job karta hu aur aur kaam k silsile me bahar rehta hu"Shoib ne apne lehje ko normal rakhne ki koshish karte huye kaha tha... us ne jawab dete waqt najeeb ki aakho ke dekha tha jo k surkh aur bheegi huyi lagti thi... us ne najeeb ko taqreeban 14 saal baad dekha tha tab wo ek 24 sala jazbati nojwan tha aur ab ek 38 saal ka mard tha jis k baalo me halki si safedi aa gayi thi...
"Bhai, Najeeb apne aap pe qaabu na paate huye uth k shoib k paas aya aur bola, bhai ab me ap ko jaane nahi dunga, me jaan gaya hu is dunya me sirf ap mere apne they.. mujhe itni sharmindgi he apni baato pe mene ap ko saanp kaha tha ap pe ilzaam lagaye they... maamu ki baato me aa kar ap se taluq khatam kia tha aur yahi meri galati thi... ap saanp nahi they.. saanp wo log they jinhone mjhe ap k khilaf bharkaya tha par bhai mene b gunah kia tha un ki baat me aa k jis ka ahsaas mujhe buhat der se hua tha... mujhe maaf karde bhai aur wapas aajaye apne ghar me apni family me... sab kuch ap ka aur ap hamare hen bhai me ab ap ko jaane nahi dunga mene pichle teen saalo me ap ko buhat dhundha he ab me ap ko nahi khona chahta", bhai....
Shoib bhi apne aansu nahi rok paya aur dono bhai buhat arse baad ese mile they k Zartasha bhi apne ap pe qaabu na pa aski aur wo b ro di thi... Us din Alfaazo ne Shoib ki dunya bikhairi thi par Aj dunya banayi thi..
Najeeb ko samjh agaya tha k rishte khoon se nahi hotey... mamu un ka apna khoon tha par us ne hi property k liye dono bhayiyun ko juda kia tha aur shoib bhali hi un ka apna nahi tha par us ka dil un k liye hi dharakta tha... najeeb ko b ye baat der se samjh aa gayi thi aur najeeb ne shukar kia tha k kam se kam use samjh aa to gayi thi...
No comments:
Post a Comment